Ua ave nei le faatalauula a le Komisi o galuega a le faamasinoga o mataupu tau soligatulafono ma mataupu lautele poo le civil court, i le sosaiete o alii ma tamaitai loia i lo tatou atunuu, e faailoa atu pe iai nisi e fia galulue i tofiga faamasino.
Ua faamautu mai e le Ofisa Sili o le pulega o le Matagaluega o Faamasinoga ma le Faafoeina o Mataupu tau Faamasinoga, le tuuina atu o lea manao o le komisi, i le sosaiete a loia i Samoa, ma o le taimi muamua lenei ua faatino ai lea tulaga.
O tausaga ua tuanai e pei ona faaalia e le Ofisa Sili le susuga Papalii John Taimalelagi Afele, sa filifili e le komisi poo ai loia e tofia.
E lua tofiga faamasino o le Faamasinoga Sili ua avanoa e pei ona tuumalo se tasi o tamalii sa tauaveina lea tofiga le afioga Vaepule Vaemoa Vaai, ma le tasi o tamaitai faamasino o le a faamuta i le faaiuga o le vaiaso nei lana auaunaga i le tofi faamasino ona ua faamavae, le afioga Tafaoimalo Leilani Tuala Warren.
O le Aso Faraile o le vaiaso nei e faia ai se tauaofiaga faapitoa a le faamasinoga poo se special sitting, e faamavae atu ai i le tamaitai faamasino, ua sefulu tausaga o tauaveina le tofiga faamasino e le gata i le faamasinoga faaitumalo na amata galue ai, ae o le Faamasinoga Sili poo le faamasinoga maualuga a Samoa.
