O le tatou motu tele i Salafai ua amata ai i lenei vaiaso ma lenei masina fou o Mati le galuega o le aoina mai o faamatalaga o faamaumauga o le aofa’i o tagata o se aiga ma le aofa’iga o fale, auā le Tusigaigoa tele ua fuafua e faia i le masina o Oketopa o le tausaga nei.
Ua faailoa e le ofisa o numela faamaumauina a le malo a mae’a mai Savaii ona faagasolo lea o le aoina o ia faamaumauga i le motu o Upolu.
O le 13 vaiaso o le a faagasolo ai lea galuega ua faamoemoe e tatau ona mae’a i le faai’uga o le masina o Me ma o se galuega tāua e pei ona faailoa e lea ofisa tāua o le malo o loo gafa ma le faia o tusigaigoa, ona e tāua le maua o le faitau aofa’i o tagata.
O le tusigaigoa mulimuli a lo tatou atunuu na faia ia Novema o le tausaga e 2021 lea na faamauina ai le silia i le 200 afe o le faitau aofa’i o o tatou tagata.
