Na matuai faaalia le lē fiafia o se tasi aoga i Aukilani i le vaiaso nei ina ua gaoia le $1,500, o le tupe sa aoina e fesoasoani ai e faaitiitia le totogi o camp fees i nai aiga o tamaiti aoga.

O le aoga a Beach Haven Primary i le North Shore lea e tulai mai ai le tulaga lea, fai ma sa fai le community colour fun run i le Aso Lulu ma le latou BBQ i le afiafi ma maua ai le seleni lea mo le camp a le Tausaga 6.

Na osofaia e le tagata le vaega na teu ai le tupe i le po lava o le aso lea ma o se faanoanoaga tele mo nai tamaiti ma i latou uma sa lagolago i le faamoemoe.

O loo iai i luga o upega tafailagi a nisi o ofisa faasalalau le ata o le tagata lea e talitonuina sa ia gaoia le tupe, na maua le ata i meapueata ma ua tuuina atu i leoleo.

O le tala fiafia ona ua ta’ua i lipoti e oo mai i le aoauli o le aso ananafi ua toe maua foi le aofaiga lava lea i nisi o foai ua tauaao ane i le aoga ina ua logotala tagata i le tupe ua gaoia.

Fai mai le pulega a le aoga e faafetaia le komiuniti ona o le agalelei ma o loo sue nei e leoleo le alii gaoi lea ua oso ma le tupe o le camp a nai tamaiti.