Ua faamautinoa mai e le faauluuluga o le ofisa o femalagaa’iga i le atunuu, Immigration NZ o Allison McDonald o le ia saini lelei i nisi o tulaga e pueina ai tagata ua ova aso i le atunuu e faia i le vaveao dawn arrests.

I le tulituliloaina o le mataupu lea e pei foi ona lipotia atu ananafi ua faailoa ai i le aso i le lipoti a le leitio faasalalau a Niu Sila o loo manao le malo e faamuta loa ia ituaiga pueina o tagata, arrests sei vagana ose mataupu ogaoga.

Fai mai e toa 19 tagata na pueina i le vaveao mai le va o Iulai o le tausaga na tea nei ma Aperila o le tausaga nei e ui i le faatoesega na faia a le malo i le mataupu lea i le 2021.

Na toe agiga lipoti o nei faiga ina ua finau le loia a se tasi tagata Tonga i le vaiaso nei na ta’ua ai le oo atu o leoleo i le ta o le lima i le vaveao e pueina mai lana client e ui o loo iai le avanoa e talosaga ai i se nofomau.

Mai le toa 19 e pei ona faamatala sa pueina mai i taimi i fafo atu o taimi faigaluega masani, e toa 10 o tagata Saina, toafa mai Initia, toalua mai Tonga ma le toatasi mai Samoa, ma le isi mai Indonesia. 

Fai mai la le sui failautusi a le ofisa o femalagaa’iga, Alison McDonald i le Morning Report i le taeao analeila e le o iai ni faiga faailogalanu o aofia ai i le faatinoina o galuega e pei ona afea ai tagata Asia ma le Pasefika i le vaveao.

O loo ta’ua i le lipoti lea se faamatalaga mai le minisita o le matagaluega o femalagaa’iga Michael Wood e faapea, ua ia tuuina atu se tusi i le ofisa o femalagaa’iga e faatulaga atu ai mea o loo manatu iai le malo i tulaga faapea ma e faatoa tatau ona tupu le toe tipoti o se tagata ona o ni mafuaaga ogaoga ua matuai manaomia ai lava ona faatino lea tulaga.

Faailoa e le tamaitai o McDonald e le o mailoa i le taimi nei pe toafia ni tagata overstayer o iai i Niu Sila ma atunuu e omai ai, o le suesuega mulimuli na faia o le 2017 lea na iloa ai pe ā ma le 14 afe le au ova ae silia ma le ‘afa o lea fuainumera, o tagata mai le Pasefika.