E 7.4 magnitude le malosi o se mafui’e na lūlū i le aoauli nei e latalata i Vanuatu, i le tusa o le 2.47pm taimi Niu Sila, ma e ono tula’i mai ai se galulolo i totonu o le 300km mai le vaega tonu o le mafola o le laueleele i luga a’e o le vaega na amata lūlū ai le mafui’e (epicentre).
Ua ta’ua e le GeoNet o le mafui’e e 10km le loloto i le itu i Sisifo o Port Vila ma “e le’i matuā lagonaina” i Niu Sila.
Na o le to’a 50 tagata o loo lipotia na latou lagonaina le lūlū o lenei mafui’e.
O se lapata’iga na tuuina mai le Pacific Tsunami Warning Centre e faapea e “ono fafati mai ni galu malolosi e pei o se galulolo e faapogai mai lenei mafui’e i totonu o le 300km o le epicentre i le faasolo atu i talafatai o Vanuatu”.
I le upega tafa’ilagi a le NZ Civil Defence o loo ta’ua ai le iloiloina nei e le National Emergency Management Agency (NEMA) ma le GNS Science pe faamata e aafia ai ma Niu Sila i se galulolo poo se tsunami e ono tulai mai lenei mafui’e.
Na ta’ua e lenei lipoti, ‘afai ae iai se tsunami aafia ai lenei faaitu mai le mafui’e, pe atonu i se isi 2 itula faato’ā oo mai i Niu Sila.’
E iai se ata video o loo tuu i luga o le Twitter o loo faaali mai ai le faaleagaina o le ofisa o le amepasa o Falani i Vanuatu.
Na ta’ua e le Australian Bureau of Meteorology e lē o iai se lamatiaga o Ausetalia mai lenei mafui’e.
