O le Aoga Tulagalua a Papa Puleia i le motu tele i Salafai o le aoga muamua lea o le a faamatuu ai le fesoasoani a le Malo o Siamani mo le tausaga 2023 i ana poloketi.

O le feiloaiga a le Ofisa o le Konesula a Siamani i Samoa nei ma sui o le Komiti o le aoga faatasi ai ma le Minisita o Tina ma Tamaitai Aganuu ma Agafesootai o ia foi o le Tofi o le itumalo a Palauli Numera 2 Leota Laki Lamositele e molimauina le sainia ai o lenei fesoasoani.

Ta’ua e Leota o le faamuamua lava a le Malo o le itu tau i aoaoga a le fanau ma le soifua maloloina e pei ona iai lenei fesoasoani.

“Momoli le agaga faafetai i le Malo o Siamani e ala i ana fesoasoani o loo sasaa mai auā le manuia o a tatou fanau.

“Atonu o le a iai nisi itumalo o le a mafai ona oo atu ai lenei fesoasoani auā le atina’e o fanau aoga.”

O le aoga tulagalua a Papa Puleia na faailoa e lē o loo Faauluulu ai poloketi a le Malo o Siamani, Afoa Stefan Zsegedi o le aoga muamua lea ua amatalia ai fesoasoani a le Malo o Iapani o lenei tausaga.

“O le tausaga ua mavae na ou asia ai le aoga ma feiloai ai ma le Pule Aoga aemaise le komiti ma vaai foi tulaga o loo manaomia ona faalelei.

“Sa fuafua ma o se miti ua faataunuuina lea ua ala ai le feiloaiga i le asō.” 

O lenei seleni o le a faaaogāina lea i le tiles o le a fola ai le faleaoga aemaise ai o nisi o meatotino e faaaogā i aoga a le fanau.

“O le a faatupe uma e le fesoasoani lenei ae o le a faatino e le aoga le tulaga o le fausiaina o nei vaega.”

Ta’ua e Afoa o lenei seleni o loo fuafua e maua lenei seleni i le 3- 4 vaiaso.

O le tausaga ua mavae na mafai ona tuuina atu ai le fesoasoani faapea a le Malo o Siamani i aoga e 10 i le atunuu, 4 i Savaii ma le 6 i Upolu.

“E ui ina iai se faigata ona fesoasoani i aoga i Savaii ona o le tulaga o le mamao ae peitai e ao lava ona faatāua uma fanau aoga o lea la ua amata mea ai Savaii i lenei foi tausaga i fesoasoani mai le Malo o Siamani.”

O fesoasoani tupe nei o loo i lalo o poloketi laiti poo grassroot projects ma e $20,000-$25,000 le fesoasoani e le gata i aoaoga ae o faalapotopotiga ma pisinisi.

E mai le tausaga 2019 ua 24 ai nei aoga ua mafai ona aapa atu iai le aao fesoasoani a le Malo o Siamani.