O fesoasoani o loo maua e Samoa mai ana paaga i fafo mo le auaunaga a le soifua maloloina, ua mafai ai ona faia i lo tatou atunuu taotoga o aafiaga o totoga tau ālafeauvai se’i tulou, e pei ona sa faatino e fomai e toalua ma tausi soifua e toalua mai Ausetalia.
E 11 gasegase sa faia o latou taotoga ma ua faailoa e le matagaluega a le soifua maloloina le mae’a o ia togafitiga i se tulaga manuia e pei ona sa faagasolo taotoga mai le aso 15 i le aso 23 o le masina nei o Iulai.
E toaiva tagata faigaluega o le soifua maloloina i le maota gasegase o Tupua Tamasese Meaole sa galulue faatasi ma fomai ma tausi soifua mai Ausetalia.
O lea galuega na mafai ona faatino ona o le fesoasoani a le Malo o Ausetalia e tau ala mai i le Matagaluega o le va i fafo ma fefaatauaiga a lea Malo o se paaga totino a le Malo o Samoa.
O fesoasoani faapea o loo mafai ona maua ai togafitiga mo nisi o o tatou tagata e malaga mai ai fomai mai fafo e faatino lava i lo tatou atunuu togafitiga e aunoa ma le aveina i fafo.
O loo iai nisi o polokalame fesoasoani faapea o loo avanoa ai foi ona togafiti lava i Samoa nisi o aafiaga o le soifua maloloina e pei o aafiaga tau ponaivi ma ma’i o le pa’u.
