O le faaauau pea ona maua o fanau aoga ma faiaoga o le Kolisi o Samoa i Vaivase i le koviti ua afua ai ona vaevae le tele vasega mo tamaiti ina ia tuuitiitia ai le nonofo vavalalata i taimi o vasega.
I lipoti a le Samoa Observer na faailoa ai o fanau aoga a le Vasega 9 e tolu aso e o ai i le a’oga ae o le isi lua aso e nonofo ai le fale ma faaaogā lipoti e tuuina atu e le faiaoga mo a’oa’oga.
O se tulaga ua faaali ai le popole o nisi o mātua i le lē atoa o aso a’oga a fanau e ui ua aveese uma tulaga o puipuiga poo le state of emergency mo Samoa peitai na faailoa e se tasi o faia’oga o le kolisi i le nusipepa, o le taimi nei ua vaevaeina fanau a’oga ina ia aua ne’i iai i ni potopotoga tele mo lo latou saogalemu ma faaitiitia ai le aafia o fanau a’oga i le faama’i.
I le taimi nei e silia ma le to’a 700 le aofai o fanau aoga a le Kolisi ma faia’oga e to’a 35 ma o le faamoemoe ina ia mafai ona puipuia i latou mai le ono aafia i le faama’i a o iai i totonu o vasega.
Na ta’ua foi i lipoti e iai nisi o faia’oga o loo galulue i le fale ona o tulaga o le aafia ai i le faama’i ma e oo atu i le 2 vaiaso na faigaluega mai ai i le fale mo le saogalemu.
