O Tusiata Lemuelu o se tasi o tina i le itumalo o Palauli i Savaii sa molimauina talu ai nei i le asiasiga a le tamaitai Amepasa o Ausetalia e faapitoa i le tulaga tutusa o matafaioi o tina ma tamaitai poo le Ambassador for Gender Equality, lana pisinisi o le gaosiga o le siapo.
O se tomai tuufaasolo mai le tuaa tina o Tusiata ma oo ane ia te ia ma faasolo ai i ona alo tamaitai.
O se taumafaiga foi ua faailoa i se faasalalauga mai le ofisa o le Komesina Maualuga o le Malo o Ausetalia i Samoa, ua tufa ma faasoa atu e Tusiata ma lona aiga i isi tagata ma aiga o nuu tuaoi.
E pei ona silafia e lo tatou atunuu,tasi lea o galuega alofilima o tina ma tamaitai mai anamua o le gaosiga o le siapo.
Ae mo nei aso ua lē toatele nisi ua latou faia, ae ua faafetaia ai e le Amepasa o Ausetalia le tina o Tusiata auā o loo faauau pea e lona aiga ona faatino, ma ua faagaioi ai i se tulaga faapisinisi ua faatau ma maua ai seleni e fesoasoani i le atinae o le latou aiga i aso uma.
O le totoina o le laau o le u’a o se isi lea o vaega tāua tele o le faatumauina o le gaosiga o le siapo, auā o se laau e faaaogā tonu lava i le galuega lea.
O le siapo mo le silafia e lē o toe maua gofie i nei aso i Samoa.
Ua tele ina faaaogā siapo mai Tonga auā tasi lea o atunuu tuaoi o loo mamafi i le gaosiga o siapo tetele auā o se measina tāua foi i le latou tu ma le aganuu.
O Tusiata Lemuelu na faaiuina lona taumafai i le Iunivesite o le Pasefika i le lagolago a le Malo o Ausetalia mo se avanoa sikolasipi mai le vaega o le Australian Center for International Agricultural Research.
Ua faaalia lona agaga fiafia tele ina ua faalauiloa o lona aiga e gaosia le siapo poo se siapo making family.
O le faaiuina foi o lona taumafai mai le iunivesite a le Pasefika ua avea ai o ia ma se tasi o tamaitai Samoa ua umia faailoga i tomai tau faatoaga, o se agavaa e fulisia lava i le itupa o tama tane.
