E $10 miliona lea ua toe aumai e le malo e fesoasoani i le faamamāina o Hawke’s Bay.
Ua ta’ua mai e le Newshub ananafi o lea ua mae’a sainia e le minisita o Cyclone Recovery, Grant Robertson le isi faaopoopoga e $10 miliona, e ese ai le $12 miliona na faailoa mai e le Palemia, Chris Hipkins i le vaiaso talu ai.
O se fesoasoani ua toe aumai ai i le vaiaso ua amata faamalolo nisi o konekarate i le vaiaso nei lava ona ua lē lava le tupe, ma o i latou nei o loo faamamāina le palapala to’a e mafua mai i lologa na iai i le amataga o le tausaga.
O le $10 miliona na toe sainia ananafi o le a faatupe ai galuega faaauau i le masina o Oketopa, ma o se aofai e fai lava si maualalo tele pe a faatusa i le talosaga mai tagata o loo gafa ma galuega faamamā e moomia se isi $70 miliona mo galuega faamamā, ma a leai o lona uiga e uma galuega i le faaiuga o Oketopa.
E oo mai i le taimi na toe saini ai le $10 miliona faaopoopo ananafi, ua oo atu i le $137.2 miliona le fesoasoani a le malo mo Hawke’s Bay ma ana galuega faamamā.
