O lea ua toatolu tagata ua taofia e leoleo e fesootai ma suesuega o loo faasolo pea i le maliu o le alii 20 tausaga ia Jayden Mamfredos-Nair.
O le alii lona tolu na saisai mai e leoleo i le po o le Aso Toonai o lea foi ua molia i le fasioti tagata ma na tutulai nei alii i luma o le faamasinoga faaitumalo i North Shore i Aukilani i le asō.
Na faia le faaiuga a le faamasino, Anna Fitzgibbon e taofia uma le toatolu lea i le vaaiga a leoleo ma ua faasā foi ona faailoa igoa.
E lei faatagaina foi e le faamasino le pueina o ni ata poo le pueina o faamaumauga o le faamasinoga.
O le alii o Jayden na leiloa mai i le masina o Aperila o le tausaga talu ai ma o le maua ai o le tino i se tasi o fale i Dairy Flat na suesue mai ai loa o se tasi ua fasioti e se isi ma e talitonu foi sui o le ofisa o Jayden lea.
E lē o mafai ona faamautinoa mai e leoleo poo le fale lava o le kegi a le Head Hunters i Dairy Flat lea na o muamua iai, lea ua toe maua ai le tino.
Ua faamaonia mai ai foi e le ofisa ua faamuta ai ma le sailiga o Jayden lea ua silia ma le valu masina o sue.
O le toatolu ua taofia na molia uma i le faaiuga o le vaiaso na tea nei ma e toe tutulai i le faamasinoga maualuga i Aukilani i le aso 7 o Fepuari.
