E $10,000 tala le faasalaga tupe ua tuuina atu e leoleo ile Pulega o le Komiti o taaloga o petipetiga a le atunuu e mafua i le latou soli o vavao ile tatala o latou ofisa ma nofoaga o loo faatau ai pepa o le taaloga lotto ma le TV Bingo, faapea isi taaloga faitupe e pei o le powerball.
Ua toe tapunia ai faitotoa o lea auaunaga tau taaloga faitupe ile ogatotonu o lenei vaiaso ile tuanai o le vaiaso ua mavae sa toe tatala ai le faatauina o pepa mo ia taaloga. Sa tuu fesili nisi pe aisea ua toe faataga ai lea taaloga ae o aiaiga o vavao ile laasaga lua o loo iai le atunuu atoa o loo tapu ai taaloga nei e pei o le bingo.
O le se’i foi o le lotto ile aso Toonai ua mavae na aliali mai ai se faaletonu ina ua sesē le ata video o le se’i na faasalalau ile afiafi, ma sesē ai ma le numera o le ponesi ae o se tasi lea o se’i o le masina o Fepuari. Na faatoā faasalalau le ata sa’o o le se’i ole aso Toonai na te’a nei ma faamuta ai ma le leotetele o fa’agaulēmalie o le au taaalo.
O le faasalaga tupe e $10,000 tala o se vaega o tulafono o aiaiga o vavao o le atunuu o loo tau togafiti ile taimi nei le pipisi o le faama’i.
