O le taimi muamua lenei ua malaga mai ai Samoa na lua, Samoa i Sisifo ma Samoa i Sasae i totonu o Aotearoa e faatinoina se taamilosaga lakapi tag.
O lenei faamoemoe ua fuafuaina lea i le aso 27 ma le aso 28 o Oketopa i le malae i Centre Park i Magele.
E 6 aumalaga mai Samoa i Sisifo ma le ‘au e tasi e malaga mai i le motu i Sasae ia Tutuila lea o le a taaalo faatasi ma isi ‘au mai i Aukilani nei mai kalapu o le Auckland Samoa, Counties Manukau Samoa, ma le Habour Samoa Tag, ae o ‘au mai Ausetalia ua lē mafai ona auai mai.
O le New Zealand Samoa Tag Incorporated o le a galulue faatasi e faatinoina lenei taamilosaga.
O le faamanatuina o le Teuila i tausaga uma o loo faagasolo ai le taamilosaga lenei a le lakapi Tag, lea foi o loo malaga atu ai nisi o ‘au i atunuu i fafo.
Peitai o le tausaga lenei ua malaga mai ai i latou o loo faafoeina lenei taamilosaga i Samoa i totonu o Niu Sila nei, ona se’i faalautele ma faaloloto le tulaga o loo iai le taaloga lenei i totonu o Samoa.
Ae le gata i lea se’i faalauiloa atili ai le tulaga o loo faagasolo ai lenei taamilosaga o loo faatinoina i totonu o le atunuu i tausaga taitasi.
O loo iai le fuafuaga o le komiti o loo faafoeina lenei taamilosaga i Aukilani, e faaauauina pea lenei taamilosaga i tausaga uma.
Auā e aogā mo tupulaga lalovaoa o le atunuu e tutupu a’e ma iai lo latou loto ma lagona e fia tatalo i lenei taaloga mo le atunuu o Samoa.
