E leai se isi na afaina le soifua i le mu o le supamaketi a Frankie lea o loo i lalo o le Maota o le NPF poo le NPF Plaza e pei ona faailoa e le Komesina o le Tineimu ma Faalavelave Tutupu Faafuasei, Afioga Tanuvasa Petone Mauga.
Na ta’ua e le alii Komesina o le Tineimu poo le lata i le itula e valu i le po o le Aso Gafua na tupu ai lenei faalavelave ma e oo mai le tineimu ua toeitiiti sasao le afi i totonu o lea faleoloa, ma o le vave o gaioiga na faasaoina ai le maota o le NPF.
Sa faailoa foi le galulue faatasi ai ma le Malosiaga Faaeletise, faapea le Pulega o le Suavai ma le Matagaluega o Leoleo.
Na ta’ua e umi se taimi e faia ai suesuega i le mafuaaga o lea faalavelave.
Ae ua tuuina mai foi le tuualalo a le Tineimu ina ia tautuana lava i lenei taimi o loo louloua le tau.
O le faamamafa a le pulega ia faamuamua le saogalemu, ma ia manatua e sili le puipuia nai lo le tau togafitia.
