E masani ai ona faalogoina le muāgagana – o mea e tutupu i Vegas e tuu ai pea i Vegas.
Ae i le pou a le kalapu liki a le Sydney Roosters ma le sui o le Toa Samoa Spencer Leniu, o le mea sa tupu i Vegas, ua faaauau ane i Sini Ausetalia.
Ua toe taunuu ane Leniu i Sini faatasi ma lana ‘au, lea ua sauniuni e tali i le iloiloga faaletulafono o tuuaiga faasaga ia te ia e tusa ma ni lafoga faailogalanu.
O le tama taalo ia Ezra Mam o le kalapu liki a le Brisbane Broncos e pei ona lē fiafia o loo tamamau i ana tuuaiga o Leniu sa ia faaigoa ia te ia o se manuki i le taimi o le taaloga i le va o ‘au e lua i Las Vegas i le faaiuga o le vaiaso.
Ae ua faaalia e le pulega o le taamilosaga a le NRL, e iai ia Leniu le aiā e faalogologo ai i se iloiloga e faia ma le tonu.
Ina ua taunuu ane i Sini sa ia faaalia ai i le aufailipoti i le malaevaalele, e lē o faatagaina o ia e faaali se manatu i lea mataupu i le taimi nei.
Faaalia e le Ofisa Sili o le NRL, Andrew Abdo, o se tulaga lē manuia ona ua faia talanoaga i lea mataupu, ae o le a latou gafa ai i se tulaga talafeagai.
O le lafoia o se ataata i le manuia o lea taaloga i Amerika, ua lē o se ulutala sa manatu iai pulega o le NRL ina ua taunuu ane i fanua.
Faaalia e le taitai komesina o le Lakapi Liki a Ausetalia, Peter V’landy i le aufailipoti, o mea faapenei e tutupu mai, ae e lē o aveesea ai le tauleleia o le taaloga.
Sa leai se fesoasoani i le tau faato’ato’aina o le mataupu, ona o tama taaalo o ‘au e lua sa taufai malaga faatasi ane i le faigamalaga a le vaalele e tasi e pei ona ta’ua ai, i se faalogona lē to’a i le va o tama taaalo.
I le taimi nei ua na o se tuuaiga faasaga ia Leniu, ma se laulau o faamasino o le a faia se faasalaga pe afai e faamaonia nei tuuaiga o lafoga faailogalanu.
