O loo faaauau pea ona galulue le Matagaluega o Leoleo e saili faamaumauga poo faamatalaga mai le mamalu o le atunuu i soo se tasi e vaaia le alii pagota ia Pati Chong Nee lea ua silia ma le 3 tausaga o tau sailia pea.
Taua e le Sui Komesina o Leoleo ia Papalii Monalisa Tiai-Keti i le Samoa Observer o le a le faatuatuanai e le Matagaluega le saliga o lea alii pagota. “O le a faaauau pea ona galulue Leoleo e saili mai le alii pagota lea, o le lua vaiaso talu ai sa maua mai ai ni faamatalaga peitai e le’i manuia”
O le tausaga e 2019 na sola ese mai ai Pati Chong Nee mai le falepuipui i Tafaigata ma e oo mai i le taimi nei e le’i toe maua lava. E 25 tausaga o lea alii i le taimi na sola ese mai ai faatasi ma le alii ia Aniseko Vailei peitai na toe maua Aniseko ae o loo sailia pea Pati.
Ua talosagaina ai foi le atunuu ina ia vaavaai pea ma afai ae maua ni faamatalaga ona faafesootai lea o se ofisa o leoleo.
