E 22 itumalo faapalota ua mautu a latou tapenaga ma resitala a latou Komiti mo le faatinoga o le fuafuaga a le malo fou e $1miliona tala e faatino ai atinae mo manuia o itumalo faapalota e 51.
O itumalo ia e 22 e aofia ai Falealili No.1, Palauli No.2, Gagaemauga No.2, Faasaleleaga No.1, Faleata No.1 Gagaifo No.2, Falealupo, Aleipata Itupa I Lalo, Palauli No.3, Gagaemauga No.1, Safata No.1, Gagaifo No.1, Aana Alofi No.1, Falelatai ma Samatau , Aana Alofi No.3, Vaa o Fonoti, Gagaifomauga No.3, Sagaga No.2, Faleata No.2, Falealili No.2, Vaimauga No.2 ma le itumalo faapalota Lefaga ma Faleaseela.
I le 22 ua maea resitala i le Matagaluega o Pisinisi Alamanuia ma Leipa e 12 i Upolu ae 10 i le motu tele i Salafai o lona uiga e 29 itumalo faapalota e le’i maea ona tapena o latou komiti ae o lea ua manino mai taualumaga e le’i mamao atu nei a le Palemene na soalaupule ma pasia ai le tala faaaopopo muamua o le tupe ua fulisia e sui o le fono aoao faitulafono e lagolagoina lea taumafaiga a le malo.
Ua amata faasalalau ai nei avanoa faigaluega mo le faatinoina o galuega o komiti faapalota ua faamautu a latou resitala ma o avanoa foi ia e aofia iai ma le tagata e faauluulu iai le ofisa mo galuega faapea isi tagata faiglauega e to’alua.
Afai ae maea ona resitala uma komiti o itumalo faapalota e 51 ona tulai mai lea e 153 avanoa faigaluega ua mafai ona fausia i lalo o lea taumafaiga tau i le atinae o le tamaoaiga o itumalo i fuafuaga a le faigamalo fou. O komiti taitasi e 15 ona sui auai e taitaifono ai le sui faipule poo se tasi e nofo mau i se itumalo e lagolagoina lea taumafaiga ma o se taimi muamua ua faatulai mai ai e se faigamalo. E maua uma foi alauni o sui o Komiti o le a galulue faatasi ma sui o nuu poo pulenuu ma sui tamaitai o nuu ma afioaga.
O le tausaga muamua o le paeaiga fou a le Palemene lona 17 o le a faasafua muamua atu ai i itumalo vaega tupe e silia ma le $200,000 o le tupe faavae lea o le polokalame e faatuina ai ofisa mo le faia o galuega ma faatupe ai nisi tapenaa ao lumanai le tausaga faaletupe fou 2022-2023 o le a faatoa faasafua ai le $1miliona tala mo itumalo faapalota e 51.
