O le Aso Lulu o le vaiaso nei e tatau o faaoo atu ai i le faamasinoga finauga tusitusia poo submissions mai loia o loo lotolotoi i le tagi tau palota a Falealili 1, mo le faia o iloiloga auā se faai’uga a le faamasinoga o palota.
O le Aso Faraile na te’a nei na iloilo ai e le faamasinoga o palota molimau tauto tusitusia mai molimau e to’alua a le itu tagi e aunoa ma le auai o ia molimau o se ulugalii o ni tagata palota e lagolago i lē na faauluina le tagi tau palota.
O loo tuua’ia i lea molimau se tinoitupe e 150 tālā na ave i se tagata palota ma le faamoemoe e faatosina ai e palota i le sui o loo molia, le faipule o Falealili 1.
O iloiloga nei sa faaauau ina ua lē finagalo le itu o loo faasaga iai le tagi e tuuina atu ni latou molimau e tali ai i le tuua’iga e pei ona sa tuu avanoa iai le faamasinoga.
Toe pau lea o le tagi tau palota e māfua mai i le faigāpalota tele ia Aokuso o le tausaga ua mavae o loo taoto pea i foga a le malo.
E le’i faailoaina se aso o le a aumai ai se faai’uga o lea matāupu.
