Fai mai le sui palemia o le atunuu, Grant Robertson ua le o toe filemu le tetee o loo faia nei I nofoaga o le palemene I Ueligitone ma ua unaia le au tetee ina ia agai ia I o latou aiga. Tulaga ese vaaiga mai lea vaega o le atunuu ile taeao analeila ua lipotia mai ai foi e toatolu isi malu o le malo na auina atu I le falemai mo togafitiga ona o aafiaga mai se substance e le mailoa poo le a tonu ae na togi ane mai le au tetee agai I leoleo.
Ina ua fesiligia le sui palemia e le Newstalk pe iai se avanoa e ono talanoa ai le malo ma le au tetee e faatalanoa le mataupu, fai mai Robertson e le talanoa le malo ma ni tagata e faatinoina ni gaioiga e pei ona faia ile vaiaso nei e le au tetee, e aofia ai le poloka faasolitulafono o le alatele ma le faia o isi uiga le manuia faasaga I leoleo.
Fai mai le sui palemia e lei faatuai le malo ile tali atu ma faailoa nisi o fesoasoani tau tupe mo pisinisi ae sa muai fai le galuega o le mataituina o le omicron ma ona aafiaga. Ise faatalanoaga a le tusitala o le Daily Examiner, Leao Tildsley ma Russel Coutts, se tasi o alii milionea ma se seila iloga foi a Niu Sila i tuugavaa, na ia taua ai sa fia oo ile nofoaga o loo faia ai le tetee ma ofoina foi lana lagolago I nisi o tagata mae talitonu o se tulaga lelei lea ole faaleo o lagona o tagata ma e ono fesoasoani foi ile fetuunaiga o nisi o mea ile lumanai. Na ia taua mo ia lava ia na te talitonu o le taua o le tetee lea ina ia faamautu ai foi le lumanai mo fanau ma ia mafai ona maua le saolotoga e soifua ai nai lo le tulaga faamalosia e pei ona iai nisi aiaiga o tui puipui lea o loo tetee ai le toatele.
Fai mai Russell e faalogo pea I le au faasalalau o lipoti atu e nao ni nai tagata o loo iai I le solo tetee peitai o lana maitau I le taeao analeila e toatele mamao atu tagata o loo iai I lea nofoaga nai lo le aofai o loo lipoti atu.
