E 30 aso ua tuuina atu e le Pule o Maliu poo le Coroner le afioga i le tamaitai Faamasino o le faamasinoga faaitumalo le afioga Alalatoa Rosella Papalii i le Loia Sili a le Malo faapea le faatonu Sili o le Soifua Maloloina e saili ai se fomai e faia taotoga faapitoa poo se pathologist mo tino maliu e 7 o loo aafia i suesuega a le Faamasinoga,
O ia tino maliu e aofia ai se alii talavou 14 tausaga le matua ua manaomia vave se taotoga faapitoa e saili tonu ai poo ai lea tagata ae o le a foi le mafuaaga o lona maliu. Ua savalia nei le 3 masina talu mai Aukuso o le tausaga na te’a nei na ave ai se faatonuga i le Faatonu Sili o le Soifua Maloloina ia Leausa Dr. Take Naseri ma le Loia Sili a le Malo ina ia saili se fomai e faia taotoga faapitoa mo le suesueina o tino maliu se tolu peitai o lea ua oo le numera o tino maliliu i le 7 e manaomia lea taotoga mo suesuega a le Faamasinoga ae le’i faia ia taotoga faapitoa.
E pei ona silafia na aliali mai foi le faaletonu o le tuai faia o taotoga faapitoa mo nisi o tino maliliu na umi se taimi o faatali aiga mo le teuina e mafua lava i le tuai maua o se fomai e faia taotoga faapitoa. O fomai e iai le tomai i le faia o ia taotoga na aumai i se fesoasoani mai le Malo o Sainana vave ai ona faia ia taotoga ma ave tino maliliu e falelauasi peitia o lea ua toe tulai mai.
Ua faaalia e le Faamasino le Pule o Maliu le Coroner i lana tusi i le Loia Sili ma le Faauluuluga o le Soifua Maloloina ua toe tuliloa ai le tatua ona fai o taotoga faapitoa afai ae le foia vave le faafitauli i le maua o se fomai e faia lea taotoga faapitoa e le fesiligia le tualga faaaauau pea o le tulai mai o lea faaletonu.
