I se isi lipoti lata mai o le faalavelave i Sini lea na fana ane ai e se taavale le alii na taalo muamua i le Kiwi, o Matt Uta’i, e iai le talitonuga o leoleo, e ui lava e iai se tasi na fuafua tagata na oatu i le taavale e fana, ae iai le talitonuga, e lē o Matt Uta’i lea na latou taula’i iai.
O le taeaopo o le Aso Lua lea na tula’i ai lenei faalavelave, ina ua masau ane se taavale SUV i luma o le fale o Uta’i ma amata ona tafana atu e tagata sa i totonu o le taavale ma lavea ai Uta’i, a o savali ane i lana taavale mo le aga’i atu i le galuega.
Na ta’ua e se tagata tuaoi e faapea na faalima ona ia lagona le pā pā o ni laaumalosi, ma na latou savavali atu iai ma iloa ai le tagata lea e taatia mai.
Ta’ua e leoleo, e le’i umi mulimuli ane i lena lava aso, ae latou maua le taavale o le ituaiga SUV ua mū mai i Samuel Street, ma e talitonu leoleo, o le SUV lea e fesoota’i ma le faalavelave lea na tafana ane ai Uta’i.
O le atalii o Uta’i, le alii o Iziah Uta’i, e iai ona sootaga ma se vaega poo se faalapotopotoga e iloga i totonu o Sini i soligatulafono aemaise i le umia o fuālaau faasāina ma ‘au’upega mata’utia, le Alameddine Network poo le Alameddine Family, ma na auai foi lenei vaega i ni taugāfana na lipotia i magāala o Sini i le tausaga talu ai.
E talitonu leoleo, e leai se aafiaga o Matt Uta’i i soligatulafono ia e aafia ai lea faalapotopotoga o loo sootaga iai lona atalii, ma o le faalavelave ua afaina ai, e talitonu ua fana sesē.
Ua faaleo ai lagona faanoanoa o le kalapu liki a le Canterbury-Bankstown Bulldogs, lea sa taalo ai Uta’i i le su’egāsiamupini i le 2004 ma manumālō ai, ina ua maua le tala i se tasi o a latou uō mamae, ma o loo momoli alofa’aga o le kalapu ma moomooga ina ia vave ona toe faafoisia le malosi ia Uta’i.
