Ua fa’amaonia e le Matāgaluega o le Soifua Mālōlōina le fa’aopoopo ai o le to’alua fou ua maliliu i le koviti-19 faatasi ai ma i latou fou e to’a 427 ua pesia i le siama o le Koviti – 19. 

Ua oo atu ai le numera o i latou ua maliliu i le koviti i le to’a 9 tauala mai le ripoti na tuufaatasia e le Matagaluega mai le iutla e 2:00 aoauli o le Aso 8 o Aperila agai le Aso 10 o Aperila 2022. 

O le toalua fou ua faaopoopo i le au maliliu o ni tina e 90 tausaga ma le 63 tausaga le matutua. O le amanaia ma le fa’aaloalogia o ‘āiga o e ua māliliu, o le a lē i ai ai nisi fa’amatalaga fa’aopoopo e tu’uina atu. 

Faailoa e le Matagaluega o i latou ua faitauina i e ua māliliu ona o le Koviti – 19, ua mae’a ma mautinoa uma i fa’amaumauga ma su’esu’ega ua lipotia e le Ofisa ma fa’amauina ai o sea maliu e feso’ota’i ma āuga o le Koviti – 19 

E to’a 12 i latou o lo’o taofia i le Maota Gasegase i Moto’otua ma le to’atolu (3) o lo’o i le Potu Tigāina talu mai le 48 itula i le itula e 2:00 i le aoauli o le Aso 08 Aperila 2022 se’ia o’o mai le 2:00 i le aoauli o le Aso 10 Aperila 2022. 

Ua fautuaina ai foi e le Matagaluega le mamalu o le atunu’u, ina ia utagia ma usitā’ia fautuaga fa’alesoifua mālōlōina o lo’o tu’uina atu pea e le Matāgaluega o le Soifua Mālōlōina ma le Ofisa o Fa’alavelave Fa’afuase’i (N.E.O.C.) ina ia nofo lelei i ‘āiga ma taofi le alu i le galuega pe afai ua māua ni āuga ua fa’alogoina ai ua fa’ama’ima’i ma ua lē atoatoa ai le malosi o le tino.