O loo taofia nei i le falema’i se alii na aveina se loli e ave ai masini mamafa poo se loli pa’u sefulu, ona o ni manu’a e mafua ina ua oso i tua ma le auala tele le loli sa ia aveina, ma alu atu soso’a se faleapa o se aiga i le nuu o Vaipu’a i Savaii.
Ua faailoa e le Komesina o leoleo i se lipoti lea faalavelave na tupu i le Aso Lulu o le vaiaso nei, a o faia ai suesuega a leoleo pe na mafua i se ā le faalavelave.
E leai se isi poo nisi sa i le fale o le aiga i le taimi o le faalavelave.
I se isi tala mai le auaunaga a le soifua mālōlōina, ua ave le faafetai a le pulega o lea matagaluega a le malo i le atunuu ma le aufaasalalau, i le tali atu i le talosaga na tau saili ai se aiga o se alii e i le va o le 50 ma le 55 tausaga le matua, o loo taofia i le maota gasegase i Motootua i ni aafiaga tau gasegase, ae na avatu e leoleo e lē o malamalama pe unconscious lea tagata.
O le faasalalau ai i luga o upega tafailagi ma auala o faasalalauga o le manaomia o nisi e silafia lea tagata, na oo atu nisi o le aiga i le falema’i.
E lei faasalalauina e le matagaluega o le soifua mālōlōina le ata o lea alii ona o puipuiga i ona aiātatau aemaise o lona privacy.
