O loo iai le popolega o nisi o loia i mataupu tau femalagaa’iga i le telē o le pa’ū i le numera o tagata milionea e tuuina iai le ituaiga visa e ta’ua o le Active Investor Plus visa lea e mafai ai ona aumai i Niu Sila.
Na ta’ua i le lipoti a le One News o le ituaiga visa lea e tuuina ai le avanoa i tagata e tele tupe e nonofo ai i le atunuu ae na faia iai ni suiga i le masina o Iulai 2022 ina ia faamalosia ai le inivesi sa’o mai i kamupani o loo i totonu o Niu Sila.
Talu mai lea taimi e pei na faailoa i le lipoti e na o le toa 20 tagata ua tuuina iai le visa lea ma e faitau selau i le tausaga le eseesega ua maitauina ua faaitiitia ai le numera o i latou e talosaga mo lea visa.
O nisi o i latou ia ua o latou inivesi le 17 miliona i totonu o Niu Sila pei ona faamauina i le mae’a o le masina o Ianuari, o le ‘afa o lea seleni agai i kamupani i le atunuu ma le isi vaega i faaputugatupe o loo puleaina lelei ma le sharemarket.
Faailoa e le NZ Trade and Enterprise o le isi 31 talosaga mo le visa lea o loo iloiloina o le toatele e mai Amerika i Matu ma Europa.
Fai mai o le faiga sa iai talu ai sa toatele i le au inivesi mai Saina ma ua feta’ua’ina o se isi mafuaaga o le pa’ū tele i le numera o le au talosaga e mafua mai i le vaega ua faia ai aiaiga i le gagana Peretania e tatau ona faamalieina.
Fai mai loia o loo misi e Niu Sila inivesi ia e maua mai i tagata faapea ma e tele le tupe ua lē o toe sau i le atunuu ma ua faigata tele le faiga fou ua iai nei ma ona aiaiga.
Peitai fai mai le pule sili o le NZ Trade and Enterprise, Dylan Lawrence o loo fetaui le numera o tagata talosaga ona o loo taulai lava i le 50 tagata inivesi i le tausaga e inivesi ai le ‘afa piliona i le atunuu.
Puna o Faamatalaga: https://www.1news.co.nz/2024/04/09/visas-for-wealthy-investors-decline-nz-economy-takes-hit-lawyers
