Ua faasala tupe i le $2000 tala le Kapeteni o le Vaa Leoleo o le Nafanua ma tuu ifo i lalo lona tulaga faaleoleo i le Ta’ai Lua poo le Corporal.
O le Aso Lua ua mavae na fai ai lea faasalaga i le faamasinoga faaleoleo poo le
police Tribunal na faatino e le tamaitai Sui Komesina o Leoleo ia Papalii Monalina Tiai Keti. O le faasalaga lea ina ua maea ona suesue moliaga na tuuaia ai le susuga Taito Sefo Hunt ma faamaonia tuuaiga e tolu o lona faatamala faapea lona faatalalē i le faatinoina o ona tiute na mafua ai ona pa’ulia le vaa leoleo a le Nafanua ia Aukuso o le tausaga na te’a nei.
O le suesuega a le faamasinoga faaleoleo faapea lana faaiuga ua taunuu iai aemaise o le faasalaga ua faamoemoe e tuuina atu i luma o le Komisi suesue lea ua maea ona filifilia ona sui ina ia silasila iai.
E le’o iloa pe toe tuuina atu le mataupu mo se suesuega a leoleo mo le faia o ni moliaga faasolitulafono poo criminal charges. O le taimi nei o loo i Ausetalia le vaa leoleo mo le toe faaleleia o vaega ma faaleagaina ina ua paulia i luga o le vaega o a’au e lata i le ava o loo ofi atu ai vaa i le uafu i Salelologa.
Sa umia e Taito le tulaga faaleoleo o le Super Intendent ma o lea ua see ifo nei i lalo lona tulaga o le Taai Lua.
