Ua saunoa le faaulululuga o le asosi o tagata taaalo lakapi i Niu Sila le NZRPA, Rob Nichol i le autusitala a le Stuff, e tusa pe aofia ai le ponesi ua folafola ane mo tamaitai taalo lakapi a Egelani, e le faatusalia lea i le maliega ua iai nei mo tamaitai taaalo o le Black Ferns.
O le lipoti lenei ua ta’ua ai o tamaitai taaalo lakapi a Niu Sila e aupito i lelei ai totogi i le taaloga i le lalolagi atoa. Fai mai Nichol o Niu Sila lava ia o tamaitai taaalo lakapi o loo faaauau pea ona totogi i se tulaga e maualuga atu na i lo se isi lava atunuu.
Fai mai o le Black Ferns 15s o loo totogi i paketi e i le va o le o le 70 afe ma le 130 afe i le tausaga, ma e maualuga atu nai lo totogi e maua e tamaitai taaalo Egelani i totonu o le 12 masina e tusa foi pe tuu iai ma se peimeni o se ponesi e ono maua i le Ipu o le lalolagi.
Fai mai le Ofisa Sili e ui e na o se vaega toaitiiti o le ‘au e maua totogi ia e silia ma le 130 afe ae o le totogi aupito i laitiiti lava o le teine taalo e le itiiiti ifo i le 70 afe.
Na faailoa foi e Nichol o teine taaalo foi o le Black Ferns o loo maua nisi faamanuiaga i taaloga o le tai 15 ma le lakapi taitoafitu foi lea foi e maua totogi o paketi e i le va o le 70 ma le 130 afe i le tausaga.
O lipoti mai le UK i le amataga o le vaiaso nei ua ta’ua ai le iai o le fuafuaga e ofoina le tai 30 afe o se ponesi i tamaitai taalo a Egelani pe a malo i le Ipu o le lalolagi o loo faagasolo nei.
