Ua faamaonia mai e le team o le aulavea’i poo rescuers i Lake Tahoe i Kalefonia ua o latou mauaina tino maliliu e to’a 8 o le ‘aufaasee poo skiers lea na tau sa’ilia talu mai le sologa ‘aisa i le Aso Lua o le vaiaso nei.
Lipotia e le CNN o le sa’iliga o loo faaauau pea mo le isi to’atasi o le ‘aufaasee lea ma e talitonuina ua maliu foi.
Fai mai leoleo i lea faaitu o le isi ua faamaonia le maliu o le to’alua o se tasi sa auai ai i le sa’iliga ma ua atili faigatā ai ona faatino le galuega.
O le taimi na tupu ai le sologa ‘aisa lea, sa lipotia e to’a 15 le ‘aufaasee o loo sa’ilia peita’i na mafai ona faasaoina le to’a 6 ae totoe ai na o le to’a 9 lea ua maua le to’avalu ma le tasi o loo faia pea iai sa’iliga.
E lē o mafai ona aveesea mai ia tino maliliu mai le ‘aisa ona o le faigatā o tulaga e pei ona iai i lea nofoaga.
Ua faailoa mai e leoleo e to’a 7 tama’ita’i ma alii e to’alua lea e talitonuina ua maliliu uma.
Ua fautuaina tagata ia ‘alofia le aga’i atu i le nofoaga se’ia toe iai se faaaliga.
Puna o Faamatalaga: https://www.bbc.com/news/articles/cvg19dp4vxgo
