E lua ni vaega o se folasaga a leoleo ua i luma nei o le faamasinoga e fua iai se aofaiga o se tupe e faasala ai le alii Asia mai Saina o Qingping Yan, ua faamaonia ni ona moliaga o le taumafai e aveese faananā ma Samoa se pusaoloa tele o figota o le sami e pei o fugafuga, sea ma maisu.
O ni figota e taulia ma alumia i maketi i atunuu Asia, ona o se matai’ai e fai ai taumafa a tagata o ia atunuu.
O le tupe e maua i figota na taumafai lea tagata e ave faananā e $1.8 miliona tala Samoa.
O le tau atoa ia o taga e 202 o maisu, sea ma fugafuga.
I le tulai ai o Qingping mo se faasalaga a le faamasinoga i le faaiuga o le vaiaso ua mavae, ma tuuina atu ai e loia a leoleo ni tapenaga se lua o formula e silasila iai le faamasinoga e faavae ai sana faaiuga i se sala tupe e talafeagai ma fetaui e fua i le tau atoa o figota na taumafai lea tagata Asia e aveese faananā ma le atunuu, ae o loo iai le tapu ua faasā ai ona toe fagotaina ia figota mo ni faiga faapisinisi.
O le tasi o formula a leoleo o loo fautuaina ai se salatupe e silia i le $168 afe tala, ae o le isi formula o loo fautuaina ai se sala tupe e silia i le $175 afe tala.
Na mafua ona tapena atu e leoleo ia formula ona o le tausaga ua mavae ina o le a lau se faaiuga, sa tuuina atu e leoleo se sala tupe e lei faamalieina ai le faamasinoga, pe a fua i le tau atoa o le pusaoloa o fugafuga, sea ma maisu.
Ua toe tolopo nei le lauina o le faasalaga o le alii Saina se’i silasila le faamasinoga i folasaga ua tuuina atu e leoleo, ae avanoa ai foi le loia a lē ua molia ona silasila iai ma tapena se folasaga e fua iai se faasalaga tupe.
Ua fautuaina e loia a leoleo le aveesea faamalosi o lea tagata ma Samoa pe tipoti ese, mo le umi e lua tausaga.
O le tasi o moliaga o loo tuuaia ai le alii Saina o Qingping o lona taumafai e totogi tupe lē sa avea ma Ofisa Sili o le Matagaluega o Tiute ma Tupe Maua, i lona ave iai o se tinoitupe e lima afe tala, ae ia taofia ai le suesueina o lana pusaoloa na faamoemoe e ave i fafo ma lana uta o figota e pei ona faailoa atu.
