E to’atolu tagatānuu mai Amerika ua aafia nei i le tulafono o le aumai faananā o ni pauta faasāina.
Ta’ua i lipoti o le taimi na taunuu ane ai le malaga mai Los Angeles, ma faatautaia iloiloga masani i ato ma meatōtino, o lea na ave ai loa i la’ua e su’esu’e a la ato, ma o iinā na maua ai loa e le ofisa pauta faasāina.
I se pepa o faamatalaga, e lua ni ‘ato a le tasi o tagata na maua iai le 11 o ni afīfī o loo iai i totonu le ‘aisa o le methamphetamine.
Ua faamauina e lata i le $8.9 miliona le tau aofa’i o pauta na maua pe a faatau atu i tua.
Ua tula’i ia alii i luma o le faamasinoga ma ua molia nei i le moliaga o le aumai i totonu o fualaau faasāina o loo i lalo o faatulagaga o fualaau faasāina matuiā poo le vaega ua ta’ua o le Importation of a Class A controlled drug ma le moliaga o le umiaina o fualaau faasāina o loo i lalo o faatulagaga o fualaau faasāina matuiā poo le Possession for Supply of a Class A controlled drug.
Faailoa e le faatonu o Tiute i le Malae Vaalele a Aukilani, Paul Williams, ua maualuga atu le numera o ‘aisa o le methamphetamine ua o latou taofia ma maua i lenei tausaga nai lo o isi tausaga ua te’a.
Faaalia foi e le faatonu, le alualu pea i luga o le numera o ē e taumafai e aumai faananā fualaau faasāina i totonu o le atunuu, ona o gaioiga auaufaatasi a le tele o kulupu o loo faia ia gaioiga faasolitulafono.
Puna o Faamatalaga: https://www.customs.govt.nz/about-us/news/our-stories/three-arrested-after-customs-seizes-30-kilograms-of-methamphetamine-at-auckland-airport?fbclid=IwY2xjawN9y3ZleHRuA2FlbQIxMABicmlkETF5REw0a2dVYTZvSE85dGd0c3J0YwZhcHBfaWQQMjIyMDM5MTc4ODIwMDg5MgABHiGzxldlhcg7HvhJRIex8UwD1E4i2RFH6riz0jRv-BCKLohVsX1gIDi-ZVeM_aem_aVaB6nsiZHYBi3Kf1DMD3w
