E lē o nā ma le lāina le to’atele o sui o le auaunaga a leoleo ua maitauina le aga’i i Ausetalia mo sa’iliga manuia, e pei ona aga’i ai e galulue mo le Matāgaluega o Leoleo i lea ituvai.
Ua faamaonia i lipoti mai le leitio faavaomalo ua toe faasolo polokalame o le sa’iliga a Australia’s Northern Territory Police mo nisi e faigaluega mo i latou.
Ma o le a faasolo i Aukilani, Rotorua, Napier, o Ueligitone ma Kalaiesitete.
Ae ua faaalia manatu o le alii Komesina o Niu Sila, Richard Chambers, i nei polokalame, ma ua ia fesiligia ai foi tulaga o le va nonofo ai o auaunaga o atunuu e lua.
Manatu Chambers sa tatau i le auaunaga mai Ausetalia ona faafesoota’i atu o ia, a o le’i faatino ia fuafuaga.
Ta’ua foi e Chambers, e ui i le mata’ina o sui o le auaunaga a Niu Sila i tulaga o ana tagata faigaluega ma le faatino ai o a latou galuega ae i lona iloa e tatau lava ia Ausetalia ona tinoū i latou e atia’e a latou lava tagata i le faatino ai o galuega faaleoleo.
Faamauina foi le faatautaia ai o se polokalame i luga o le upega tafa’ilagi o le You Tube, o se faamalosi‘au a le alii Komesina, Richard Chambers mo alii ma tama’ita’i leoleo Kiwi ina ia faatumauina lo latou fia galulue pea i totonu o Aotearoa nai lo o le malaga ese atu ma le atunuu.
Ma e faaalia, talu lea polokalame, e 16 leoleo ua toe faafesoota’i atu.
Ta’ua le to’atele o leoleo e malaga atu i Ausetalia mo sa’iliga manuia e ala i totogi, ma isi ua faaaliga le toe foi mai, ona o le misi alofa i aiga ma le faigatā ona tuua mafutaga.
O isi ua faaalia le lē lelei o tulaga o le iai i galuega i Ausetalia.
Ae e ui i faamaumauga ua tuuina mai ma taumafaiga a le Komesina ma le auaunaga a leoleo iinei i Niu Sila, ae o lea ua faailoa e sui o le Northern Territory Police ia Serge Bouma, e 21 tagata ua faaalia lo latou fia auai e galulue i Ausetalia.
Faamanino e Bouma e oo atu i le $130,000 le totogi o le leoleo e mafai ona ia maua i le tausaga i le Territory, e aofia ai ma le fesoasoani i fale e faamautū ai, e pei ona faamatuu ai le alauni e $31,847 tālā Ausetalia.
Ta’ua o tagata e amata atu – poo Recruits o loo faasolo a latou polokalame faalea’oa’oga i itu faaleoleo e $95,000 Ausetalia le totogi e amata ai se’ia oo lava ina mae’a a latou polokalame e pei ona iai siitaga e $122,000, ae lē aofia ai alauni e ono maua e le tagata faigaluega.
Puna o Faamatalaga: https://www.rnz.co.nz/news/national/577035/australia-s-northern-territory-police-renew-push-for-new-zealand-officers
