O le manumālō o le ‘aulakapi liki a le atunuu le Toa Samoa i le la taaloga ma le Mate Maa Tonga i le po o le Aso Sa, ua mautū ai lona avanoa i le taamilosaga o le Ipu o le Pasefika le Pacific Championship, a o tālia ai le taaloga a le ‘aulakapi liki o le Warriors a Niu Sila ma le Mate Maa Tonga i le vaiaso fou.
E pei ona sa maimoa ai e le atunuu ma le lalolagi lea taaloga i auala faasalalau o televise sa maualuga le tapenaga a le Toa Samoa, e fua i le tulaga sa iai lana taaloga ma Niu Sila.
O ‘ai o le taaloga, o le Toa Samoa e 36 ae o le Mate Maa Tonga e 6 i le sikoa na maua o le a mae’a le ‘afa mulimuli lea na taofia ona o tulaga louloua o le tau i le nofoaga sa faia ai le taaloga, le malae o Suncorp Stadium i Brisbane i Ausetalia.
O le lata i le sefulu i le po i le Aso Sa i Samoa, e le’i nofo lelei ai le tapua’iga i le molimauina o le fe’ei leotetele o pu o taavale sa feoa’i i le taulaga e faailoa le loto o le fiafia ua tau manuia le taaloga a le Toa Samoa.
Ae a o loma lea taaloga a le tatou ‘aulakapi liki sa avea le Minisita o le Matāgaluega o Taaloga ma Alaga’oa mo le Soifua Fiafia o Tagata, le tofa Seuamuli Fasi Toma, e saunoa i le Palemene e momoli faamanuiaga i le Toa Samoa faapea le ‘aulakapi liki a tama’ita’i le Fetu Samoa.
Sa molimauina foi i auala o fesoota’iga a le malo le momoli atu ai ma faamanuiaga mai le ta’ita’i o le Malo le afioga i le Palemia.
