Ua manino nei le tulaga ua taoto iai tagi e valu sa faaulu i le Faamasinoga Maualuga ona o moliaga o faiga faaalatua sa aliali mai i le faigāpalota tele a le atunuu ia Aokuso, ma ua taoto mai ai e tolu lava tagi ua su’esu’eina e le faamasinoga, ae o isi tagi e lima ua ave i tua.
O le matāupu mai Falealili 1 sa fofogaina i le aoauli o le Aso Lulu o le vaiaso nei, ma tuuina atu ai folasaga a loia a itu auai i le faailoa ai o māfua’aga o le taunuu o lē na tuuina atu muamua le tagi faapea lē na molia e ave i tua le tagi.
Ua taatia atu ai nei i le Aso Faraile o lenei lava vaiaso e toe valaau ai lea matāupu mo le faamaonia ai o le maliega ua autasi iai itu auai o le faamasinoga.
O se tasi lea o tagi sa faatulaga e amata su’esu’e molimau i le vaiaso nei e lagolago ai moliaga a le itu tagi ma molimau a le itu o loo tuua’ia e lagolago ai moliaga faasaga i lē na tagi, peita’i sa faailoa i le valaauga i le Aso Lua e loia ua iai se autasiga i se maliega a itu e lua ina ia ave i tua ona ua taunuu i se leleiga.
Sa ilitata le faamasinoga e vave fai se faai’uga ona sa poloa’iina loia e tapena atu ni folasaga e faailoa ai māfua’aga o lea tulaga.
O le mae’a o ia folasaga i le Aso Lulu ua tolopō ai i le taeao o le Aso Faraile nei e faamautū ai se finagalo o le faamasinoga i le taunuuga ua malilie iai lē na tagi ma lē sa faasaga iai moliaga o faiga faaalatua, le sui faipule o Falealili 1 na toe filifilia i le palota tele le afioga Toelupe Maoiautele Poumulinuku Onesemo.
O le tofa Tuiloma Tusa Laniselota Lameko sa tauva mo le itu faaupufai e puipuia aiā tatau a tagata na faauluina le tagi.
