O le ‘auga lena o se finagalo o le afioga i le alii Faipule o le itumalo Safata 2, le afioga Tuia Paepae Letoa, ina ua fesiligia e tusa ai o le fesoasoani tau seleni lea ua faailoa mai e le malo le auina atu mai le malo Niu Sila, le 6 miliona tālā Niu Sila, e maua ai le 10 miliona tālā Samoa, o se taui tupe mo le itumalo Safata, e tusa o aafiaga o le itumalo i ona vala eseese talu ona pa’ulia le manuao a Niu Sila le HMNZS Manawanui i luga o aau o le afio’aga o Tafitoala i le Aso Toonai, 5 Oketopa o le tausaga talu ai, 2024, ma magoto ifo ai loa i le ilititai i le aso na sosoo ai, Aso Sa, 6 Oketopa.
I se avanoa na faasoa ai le afioga i le alii Faipule i luga o le polokalame o le Gagaifo o Faiva a le Radio Samoa, na ia faamautinoa mai ai le seleni lea ua faailoa e le faigāmalo, o le a tuusa’o atu lava i aao o le itumalo mo le vaevaeina i afio’aga uma o lona itumalo.
Saunoa Tuia, e moni lava o gatai ane o Tafitoala lea na satia ma magoto ifo ai le vaa, ae ua iai lava le aafiaga o isi uma afio’aga o lona itumalo, ma o se tulaga talafeagai ai le faasoa lelei o le taui tupe o le a tuuina atu ina ia manuia uma ai afio’aga o le itumalo.
Peita’i i le aotelega o le faasoa a Tuia, na ia faailoa ai e iai lava vala o loo lape ai le faagasologa mai o lenei matāupu, aemaise ai e lē o lava lenei taui pe a fuafua i aafiaga o lona itumalo.
Na saunoa Tuia, o le goto ai o le Manawanui i gatai o Safata, e lē gata na mu le vaa i luga o le ilititai, na goto ifo i le ilititai, ma o la ua taatia ai lava e oo mai i le taimi nei ma ua telē ai le afaina i le itumalo.
Ua afaina le tamaoaiga, afaina le soifua o tagata i aso faipea, afaina fanau e le’i fananau mai, afaina faasao a le itumalo, ua afaina foi aganuu ma lagona, o agaga o tagata o le itumalo.
Sa faatusatusa e le alii Faipule le mala na tula’i mai i le Manawanui, ma le vaa o le malo Italia, le MV Rena lea na oso i le aau i gatai ane o Tauranga i Niu Sila.
Na saunoa le Faipule, ina ua goto le vaa lea i Tauranga i le tausaga e 2010, e 26.7 miliona le tupe na totogi mai e le malo Italia i le malo o Niu Sila mo galuega toe faamamā (clean up) ma isi poloketi eseese ina ia toe faafoi lava le gataifale o Tauranga i lona tulaga sa mua’i iai.
I nisi o sa’ili’iliga atili i upega tafa’ilagi sa lipotia ai lenei faalavelave, o loo ta’ua ai le iai foi o se taui tupe e $11 miliona na faatulaga e le kamupani e onaina le vaa ma le latou kamupani inisiua ina ia tauia ai pisinisi a le aai (local businesses) na faaletonu a latou tupe maua mai lenei aafiaga, ma sa lafo atu i le Faamasinoga Maualuga a Tauranga e nafa ma le tufatufaina o lena seleni.
I lena faatalanoaga ma le alii Faipule, na saunoa ai foi Tuia i lena faalavelave i Tauranga, e telē foi se taui tupe na tuuina mai e le kamupani e ona le vaa mo iwi a Māori na afaina, aemaise lava i aafiaga o faalogona ma mafaufauga o tagata talu ai suiga tetele ua iai mai lenei faalavelave; aemaise ai foi la le tele o nisi lava fesoasoani mo le faaauauina ona mata’itūina ma faaleleia nisi vaega o le aai e toe alia’e mulimuli ane.
Sa ta’ua e Tuia nisi o aofa’iga tetele o seleni na foai e le malo Italia ma le kamupani e onaina le vaa na sa’e i Tauranga, e pei ona sa ia ta’ua le silia ma le $500 miliona i lana faasoa i luga o le Gagaifo o Faiva, ma ta’ua foi le $700 miliona i le latou feiloa’iga ma lona itumalo faapea lana lauga i totonu o le Palemene, sa tuuina sa’o atu i le Iwi mo le tauia o aafiaga i lagona ma tulaga tau i le aganuu o tagata.
E lē o iai ni faamaoniga tonu o na taui tupe na ta’ua e le alii faipule, i luga o upega tafa’ilagi o loo faamatala atoa ai lenei faalavelave ma taui na tuuina ane e le malo o Italia faapea le kamupani e onaina le vaa, vaganā ai vaega tupe e pei ona ta’ua i luga; atonu o loo aga’i le finagalo o le faipule i le tuuaofa’iga atoa o taui tupe uma ma nisi faatinoga o fesoasoani na faia e le kamupani e onaina le vaa na sa’e i gataifale o Tauranga.
A o talisapaia ai e le itumalo lenei taui tupe ua folafola o le a maua atu, ae sa iai ni vaega na saunoa le afioga i le Faipule o le itumalo, e le’i nofo lelei i lagona o le itumalo, ona o le le’i iai o se sui poo ni sui o le latou itumalo e saofafa’i i totonu o le komiti lea sa iloiloina ma faitonu mo aafiaga o le itumalo; sa iai lava le lagona e amana’ia so latou sui ina ia aua ne’i vaai maulalo ma overlooked nai tagata o lona itumalo, ina ia maua se taui e talafeagai lelei.
