E 23 tagata ua faamaonia na pu’e faapagota ma taofia e leoleo i Aukilani nei, i le mae’a ai o le taaloga i le va o le ‘aulakapi liki a Samoa le Toa Samoa ma le ‘au a le Mate Maa Tonga na faatautaia i le amataga o lenei vaiaso.
Faamauina i lipoti mai le Ofisa o Leoleo, le Counties Manukau, na molimauina e leoleo le faatumulia o luga o auala e tagata faapea taavale ua faatino ai fiafiaga i le manumālō o le ‘au a le Toa i le la taaloga ma le Mate Maa.
Ta’ua i faamatalaga sa vaaia nisi le māta’ituina o le sogalemū, a e peita’i o nisi ua fai lava ma le lē migao ma le lē uia o ta’iala o le faatinoga o fiafiaga i lea afiafi.
Lipotia e leoleo le mata’utia tele o tū ma aga lē tautamalii ma gaioiga solitulafono ua faatino i luga o auala, e pei ona molimauina le faaaogā o taualuga o taavale e tutū ai le to’atele ma le tau’aveina ma le lē faautauta o taavale a o tumutumu tagata.
I lipoti, e 14 i latou na pu’e faapagota i le Aso Toonai, to’aiva i le Aso Sa, ma le 204 na tuuina atu faasalaga i avetaavale.
Ua fautuaina ai e leoleo, e lē ‘alo lava le auaunaga mai le faatino ai o le latou pitolaau pe a latou vaai atu e lē savalia e tagata aiaiga ma ta’iala o tulafono.
Ae ua o latou fautuaina malosi tagata ina ia fiafia ma le poto, fiafia ma le saogalemu, ina ia mautinoa le lē aafia ai o se tagata i gaioiga.
Puna o Faamatalaga: https://www.facebook.com/share/p/1A1zzmkayk/
