O le itumalo lenei a Faasaleleaga Nu.1 lea ua patipatia le mautu ai o lona ofisa e tapuvae tasi iai ana galuega faatino.
I le tatala aloaia ai o lenei galuega na saunoa ai le Minisita o Tina ma Tamaitai, Aganuu ma Agafesootai, Leota Laki Sio.
“Ua mae’a tapena e le Malo taiala ma faiga faavae e faafoe ai faatinoga o fuafuaga a itumalo taitasi mo le faaaogāina o fesoasoani o loo tuuina mai e le Malo.
“Ua manino foi le anava a le Malo na fuafua ma faatino ai lenei fuafuaga.
“O lea ua o tatou oaoa ai i Faleseu ma sapi i manuia e pule ai le itumalo i ana atina’e e fai ae ia mulimulitai i taiala ua faataoto mai.
“O le fale e le faailoga tagata e le fai mea faapito ae tatou faifaimea faatasi e opogi lenei taumafaiga.”
Saunoa le Tofi o le Itumalo o le Minisita foi o le Matagaluega o Faamasinoga, Matamua Seumanu Vasati e tusa o le tala o le galuega.
“Ua silia nei ma le tausaga talu ona mae’a fausia ma faatotogaina mai le seleni na faamatuu mai e le Malo e $200,000.
“O lea seleni e lē mo le fale atoa ae aofia ai totogi mo le aufaigaluega, totogi o pili ia aemaise foi alauni o le komiti.
“O le tau sa faatatauina mai mo le fausiaina o le ofisa lava ia o le Fono Faavae e laugatasia uma ai lava itumalo e tusa ma le $132,000.
“Peitai na tuai ona faaulufaleina ma tatala lenei galuega ona o nisi o sailiiliga a Matagaluega o loo fitoitonu ai atina’e mo itumalo.”
Na faafetaia foi e le Tofi o le itumalo se tasi o aiga sa mafai ona tuuina mai se vaega o lo latou fanua mo lenei fale.
