E 28 nuu ma afioaga o le motu o Upolu o le a savalia e le auaunaga a le soifua maloloina i le masina atoa lenei o Setema, e amata atu i le Aso Gafua a sau le aso 5.
O le faamoemoe o le faia o tuipuipui o le faamai fiva taifoi, o se gasegase e pipisi lona siama, ma e fiafia e nofo ma ola i feau mamao tulou, faapea lapisi a tagata soifua ma meaola.
O fanau pepe laiti mai le iva masina e oo i tagata ua 45 tausaga le matutua e tatau ona faia le tuipuipui o le fiva taifoi. Ua faaalia e le sui faatonu sili o le soifua maloloina le susuga i le alii fomai le afioga Tagaloa Dr Robert Edward Thompsen, ua faatino lenei galuega ona ua matauina le siitia pea o le numela o tagata ua aafia aemaise lava i le fanauiti. O nuu ma afioaga o le a savalia mo le tuipuipui o le fiva taifoi:
Laulii, Leone, Malie, Satapuala, Solosolo, Letogo, Siumu, Vailoa Aleipata, Moataa, Leauvaa, Afega, Satuimalufilufi, Vaimoso, Vaiusu, Vaitele fou, Vaitele tai, Vaitele uta, Moamoa, Siusega, Falelauniu, Toamua, Aleisa i Sisiso ma Aleisa i Sasae, Matautu Lefaga, Falevao, Fasitootai, Nofoalii, ma Faleasiu.
