Ua faailoa mai e le Matagaluega o Pisinisi Alamanuia ma Leipa i se pepa o faamatalaga na sainia e le Sui Ofisa Sili o le Matagaluega le afioga Fepuleai Roger Toleafoa le iai o ni fesuiaiga i polokalame galuega faavaitaimi mo Niu Sila ma Ausetalia.
O ia suiga lea ua taofia lē tumau ai le faatinoga uma mo malaga i lalo polokalame o galuega faavaitaimi i atunuu i fafo .
O lona uiga o lenei faasilasilaga e aofai ai uma ma i latou na tapena malaga mo vaa ua atofaina mo le masina lenei o Aperila. Ua toafia lē tumau uma mo se taimi seia toe logoina le mamalu o le atunuu mo nisi faamatalaga faaopoopo e faatatau i lea mataupu.
E pei ona silafia e toatele le numera o tagata Samoa o loo apalai ma tusi talosaga atu mo avanoa i ia galuega faavaitaimi ma o le tausaga nei na amata malaga ai nisi peitai o lea ua taofia lē tumau mai faigamalaga mo lenei masina.
