I upegatafailagi a le Matagaluega o Leoleo, Falepuipui ma le Toefuata’iga na faamaonia mai ai se osofa’iga a leoleo i se tasi o pasi laupasese i Tuasivi Savaii i le aso ananafi, ina ua logoina atu e nisi o le mamalu o le atunuu i le Ofisa o Leoleo, se alii avepasi o loo masalomia lona faatauina o fualaau faasaina i taimi o ana faigamalaga.
Ma i le lipotia atu ai e le mamalu e le atunuu femalagaa’i i Tuassivi o lea gaioiga faasolitulafono na ala ai loa ona faatino le osofaiga a le Matagaluega.
Faamauina, i le faatino ai o le sailiga a leoleo na maua ai i se tamai ato sa ia tauaveina ni fualaau fa’asaina o le marijuana fa’atasi ai ma ni tagapepa iila laiti o loo iai totonu ni pauta e foliga mai o le aisa.
I lipoti o lea ua molia ma taofia e leoleo i Tuasivi le alii 30 tausaga o Salelavalu i lenei mataupu.
Ua faafetaia ai foi e le Matagaluega o Leoleo, Falepuipui ma le Toefuata’iga le mamalu o le atunuu i le lipotia atu o faiga faasolitulafono e ono aafia ai le toatele, na fautuaina foi e le Matagaluega le mamalu o le atunuu,a mautinoa ni fa’amatalaga i a i latou o loo faatino o le fa’atauina atu poo le fa’aaogaina foi o fualaau fa’asaina ina ia logoina atu ofisa.
Faaalia e Leoleo, lo latou agaga faafetai i le lagolago a le atunuu e tafiesea ma tetee atu i le faatino ai o fualaau faasaina i Samoa.
