O le maioio lelei ma faafaigofie le tulafono o loo aiaia ai aso malolo o tagata faigaluega ma aso ma’i, o le manaoga lea o le malo ma ua fai mai ai o le a faia faatalanoaga o lea suiga.
O le tulafono lenei ua tele ina lē sa’o ai ona faitau holiday pay o le toatele o tagata galulue mo le tele o tausaga, ma o le faata’ita’iga lelei lava o le aafiaga o tagata galulue a le soifua maloloina lea e toe faafoi le tusa ma le $2.2 piliona ona e lei sa’o ona totogi aso livi.
Fai mai ai le minisita o Workplace Relations and Safety ananafi, Brooke van Velden, o suiga o loo vaavaai iai le malo o le a faaleleia ai le tulafono o loo iai nei, ma e mafai ona faia i le fesoasoani a pisinisi faapea tagata taitoatasi.
O suiga i le faitauga o aso ma’i o loo vaavaai ia fua i le tele o itula faigaluega, ae o aso livi faaletausaga poo annual leave e suia mai le entitlement system agai i le accrual system.
A o agai ai le malo e faataunuu le suiga mo le Holidays Act ua fai mai le Employers and Manufacturers Association, o loo faatalitali nei e tuu atu lona tau’au e galulue ai ma le malo ona o le lavelave tele o le tulafono o loo iai nei, ua avea lea ma mafuaaga o le sese ona faitau o aso livi e agavaa ai tagata galulue.
Puna o Faaamatalaga: Annual, sick leave changes mooted as Govt seeks Holidays Act ‘certainty’ (1news.co.nz)
