Ua toafā ia Li’o Faataumalama Auava tagata ua molia ona o le mataupu e faatatau ia Sam Fauena Leautuli Su’a.
O le Aso Tofi o le vaiaso ua mavae na molia ai Auava i le moliaga o le taumafai e mimilo mau ma taupulepulega (fabricating evidence & conspiracy).
Ua faamaonia mai e le Alii Komesina le Tofa Auapaau Logoitino Filipo o le a tulai lea alii faatasi ma isi i le aso 27 o le masina nei i le faamasinoga.
E molia Auava o tālia ai le aso e faia ai lona faamasinoga faalotoifale tribunal i le Matagaluega o Leoleo o se tulaga ua faia ona o le tusi atu ai o le loia a lea alii i aafiaga o ona aiātatau.
Na faamalolo mai lea alii ma se isi tamaitai leoleo i se faaiuga mai le Komesina o le Matagaluega o Leoleo ina ua maua o la faatino se suesuega e aunoa ma le silafia ma le uia o alafua ma taiala a le Matagaluega o Leoleo i le mataupu e faatatau i le maliu o Tuuau Maletino.
Ua faailoa mai e le Komesina o le aso 22 o Aperila faatoa faia ai le faamasinoga faalotoifale a leoleo (tribunal).
Ua faailoa foi o le taimi nei e lē o taofia le suesuega a leoleo i le mataupu lenei ia Sam, ma e lē o mautinoa pe iai nisi ese mai ia i latou ua molia e toe taofia atu ma molia ona o lenei lava mataupu.
