Ua lipotia le iai o le Palemia o Samoa le afioga Fiame Naomi Mataafa i Niu Sila nei mo togafitiga e pei ona faailoa i le RNZ.
O loo ta’ua i le lipoti a le Samoa Observer se saunoaga a le Ofisa Sili o le matagaluega a le Palemia ma le Kapeneta, Afioga Agafili Shem Leo, o se taimi o le asō o le a faailoa ai e lē o loo faatinoina tiute o le Palemia i le taimi nei, le tulaga o iai togafitiga faafomai mo le afioga i le Tamaitai Palemia.
O loo ta’ua foi i le lipoti a le Samoa Observer le faamautinoaga mai nisi o minisita o le Kapeneta o le a iai le taitai o le atunuu i Niu Sila nei mo togafitiga i le vaiaso nei.
O le vaiaso lenei sa tatau ai ona toe taliu le Afioga i le Tamaitai Palemia i Samoa ina ua mae’a mai le fonotaga a le COP28 e pei ona usuia i Dubai, lea na faatulaga e auai atu iai ma le afioga i le Minisita o Puna’oa Faalenatura ma le Siosiomaga, Afioga Toeolesulusulu Cedric Schuster.
Fai mai le Leitio faavaomalo a Niu Sila sa feiloai le tamaitai Palemia ma Christopher Luxon, le Palemia o Niu Sila i Aukilani i le Aso Toonai talu ai, ma faamaonia ai e le Palemia o Niu Sila, lona lagolago mo le fonotaga a taitai o malo o le taupulega Commonwealth Heads of Government ua fuafua e faia i Apia i le tausaga fou 2024.
