O le asō foi na feiloai ai le Palemia o le atunuu ma le pulenuu o Aukilani o Wayne Brown lea o loo tele iai faitioga a tagata ona o ana gaioiga ma le tali ane i le taimi o mafatiaga ua feagai nei ma le aai.

O loo silafia e le toatele sa iai se tagi poo se petition sa amataina i le amataga o le vaiaso ua valaau ai le aveesea o Brown mai le tofi pulenuu ona e manatu le toatele e le o faia lona tiute.

Ua lipotia foi i le televise tasi sana faatoesega ua faia i le aufaasalalau i ana faamatalaga sa faia faasaga ia i latou e ala i se text ua toe liki i le aufaasalalau. 

Sa ta’ua e Brown i le Newshub o ia ua pisi tele e tali nisi faatalanoaga mai le aufaasalalau ma e manatu e manaomia ona faaleleia le tulaga tau fesootaiga aemaise foi ma le Auckland Emergency Management group.

Fai mai tagata e tau le vaaia lea pulenuu i taimi o faalavelave na tutupu nei ae maitaulia o le taimi aupito sili lea ona manaomia ai lana taitaiga, o le taimi e mafatia ai ma aafia siosiomaga ma soifua o tagata o Aukilani.