O le asō e fono ai le Auckland Council e talia le buy out package lea o loo faatalitali iai le toatele o tagata Aukilani na faaleagaina fale i lologa ma le afā i le amataga o le tausaga.
O le aso ananafi lea na fofogaina ai Councillors e tusa ma le fonotaga i le asōf ma o lea foi ua mae’a osia le maliega i le va o le pulenuu ia Wayne Brown ma le minisita o tupe Grant Robertson e pei ona sa iai i le Aso Lua.
O le faiga lenei o loo totogi ai e le malo le isi ‘afa ae o le Council le isi ‘afa e faatau ese mai ai fale e lē o mafai ona toe fau ona o le telē o le lamatia o nofoaga o loo tutū ai i taimi o lologa, ma e lē gata ai la o Aukilani ae o le faiga foi lea o loo iai mo Hawkes Bay.
O le sao o le malo ma le Council o loo fua lea i le paleni e totoe mai pe a toesea tupe mai inisiua, ma e lē manino mai i le taimi nei pe faafefea ona faia e le Council tau o fale atoa ai le faiga o le a fai mo fale inisiua ma fale e leai ni inisiua.
A o fono le Council i le asō, o lea lava na manino tala mai le malo i le masina o Iuni e tusa ma le $1 piliona le tau atoa o le poloketi lenei, ae mo le Council ma lona sao ua lipotia e faatupe mai nonogatupe lea e toe faapaleni mulimuli i siitaga o rates.
O le mae’a ai o le fono i le asō, o le a amata ai loa faatalanoaga ma i latou e anaina le faitau selau o fale o Aukilani e lē mafai ona toe fausia.
O le tele o fale na faaleagaina i Aukilani o le itu i Sisifo e aofia ai Ranui, Swanson ma Henderson e ese ai se vaega itiiti i Milford, Magele ma le West Coast.
