Ua tuufesili nisi o le atunuu o loo nonofo i Niu Sila nei i tulaga o aiaiga tonu e tatau ona uia ina ia mafai ona malaga atu ai i Samoa i lenei vaitaimi o le pipisi ai o le Koviti-19.
O se aiga na fuafua e malaga i Samoa i le taeao nei na taofia ma lē mafai ai ona malaga ona o leai o se test (RAT Test) a le la pepe 3 tausaga le matua sa fai ma le faamatalaga e faapea sa faailoa atu e le Chemist sa aga’i ai mo a latou test e lē mana’omia se test a le pepe, peitai ina ua aga’i atu i le malaevaalele ae taofia ai loa.
O aiaiga o loo i luga o upega tafailagi a le Pulega o Tagata Tafafao Maimoa mai Fafo a Samoa o loo manino ai le tatau ona fai tui o le koviti o i latou e 12 tausaga agai luga.
O le faia ai o test (RAT Test ma le PCR) o loo faailoa e tatau ona i totonu o le 24 itula a o le’i malaga i Samoa e tatau ona fai ai le Supervised RAT Test ae mo le PCR e 48 itula.
E lē o aumaia ni tausaga e tatau ona fai ai test o lona uiga e tatau ona fai uma test poo suega a tagata malaga uma e aofia ai ma fanau laiti, mai lava i le pepe meamea seia oo i tagata matutua.
