Ua mae’a le paea’iga 17 a le Palemene i fuafuaga a le ulua’i faigāmalo a le vaega faaupufai o le Faatuatua i le Atua Samoa ua Tasi ua faaitiitia aitalafu totogi a le kamupani vaalele a le atunuu le Samoa Airways, ae o le 3 tausaga sa fuafua e toe aumai ai se vaalele tele mo malaga aga’i i Niu Sila ma Ausetalia e le’i taunuu.
O lea ua faailoa atu e le Palemia o le tatou atunuu le susuga Laaulialemalietoa Leuatea Polataivao Fosi Schmidt i le Palemia o le malo o Niu Sila, ua iai le fuafuaga e toe faagaioia ia malaga ma faaaogā ai se vaalele tele lapo’a.
Ua faailoa lea fuafuaga a lo tatou malo ina ua faia se feiloa’iga a le Palemia o Niu Sila ma le Palemia o Samoa a o iai pea i Aotearoa le sa’iliga togafiti a le ta’ita’i o le tatou malo.
O le taimi muamua lea ua feiloa’i ai le Palemia o Samoa i le mae’a o le faigāpalota tele ia Aokuso ma le Palemia o Niu Sila ia Christopher Luxon ma ua faailoa ai i se pepa o faasalalauga faalaua’itele mai le ofisa sooupu o le malo o le tausaga fou 2026 o le a afea ai Samoa i se asiasiga a le Palemia o Niu Sila.
O nisi o matāupu sa talanoaina i le va o ta’ita’i o malo e lua i le feiloa’iga sa faia i le ofisa o le Konesula o Samoa i Aukilani o auala e fesoasoani mai ai Niu Sila i le tafiesea o solitulafono o le feavea’iina o laau ma fualaau faasāina, atina’e o tagata tafafao, fefaataua’iga, galuega faavaitaimi, ma le fuafuaga e fausia se falema’i autū mo Samoa e pei ona taula’i lea fuafuaga e fausia lea galuega i Tuanaimato.
Ae i le toesea ai pea o le atunuu e le afioga i le Palemia ona o lana sa’iliga togafiti ua silia nei i le fā vaiaso, ma maua ai feiloa’iga ma ta’ita’i o le malo o Niu Sila faapea le malo o Isaraelu, ua faailoa e le Sui Palemia le afioga Toelupe Maoiautele Pomulinuku Onesemo i le feiloa’iga ma tusitala i le Aso Faraile ua mavae, o le aso 16 o le masina lenei o Novema o le a tuua ai Aotearoa e le ta’ita’i o le malo ma toe taliu mai i le atunuu.
