O tulaga lē mautonu na aafia ai upufai o le tatou Malo i le tuanai o le palota tele o le tausaga 2021, ma faaumiumi ai ona tauave e le Malo Tausi lē tumau poo le caretaker government le faafoeina o galuega, ma faapea ona latou fausia ai se tala o le tupe a o lei tauaofia le paeaiga fou a le Palemene e faatauto ai sui faipule filifilia, ma faailoa ai foi le faigamalo ua pale e tauaveina le Sa o le atunuu, o nisi ia o vaega o loo ua faamauina ai ni fautuaga a le Komisi Suesue o faigāpalota ua mae’a le latou galuega ma ua tauaao e le Palemene le latou lipoti.
O le tutoatasi foi o le faatinoga o tiute o le Komesina o Faigāpalota ma lona ofisa, o se isi lea mataupu na agai iai sailiiliga a le Komisi Suesue ma fausia ai ni a latou fautuaga mo se finagalo o le fono aoao faitulafono.
Ua fautuaina e le Komisi Suesue e faamalosia ma noatia faaletulafono le 45 aso mo se Malo Tausi e faatino ai ona tiute a o lei faatauto le paeaiga fou a le Palemene, ma ia faamanino e lē mafai e se Malo Tausi ona toe tagofia se Tala Faatatau o le Tupe ma isi faaiuga ogaoga.
O le tutoatasi o le Komesina o Faigāpalota ua fautuaina le filifilia ai o ni sui se toatolu o se Komisi o Faigāpalota latou te faafoea ma faatonutonu le faafoeina o se faiga filifiliga a le atunuu e sailia ai sui o le Palemene, ae tuu le tofiga Ofisa Sili o pulega i lē o faauluulu iai le ofisa o le Komisi o Faigāpalota.
O sea fautuaga ua mafua mai i le tulaga na faatino ai e le Komesina o Faigāpalota i le palota tele o le 2021 ona tiute ona ua matauina e le Komisi Suesue i le latou suesuega le leai o sona tutoatasi, aemaise i le faauigaina o le vaega o le tulafono faasino i le 10 pasene o nofoa faaopoopo o faipule tamaitai.
O se tasi o fautuaga ua faailoa i le lipoti ua fautuaina ai le Malo ma le Palemene ia faamautu ni aiaiga talafeagai i konekarate a Ofisa Sili o pulega ma Ofisa Sili lagolago mo matagaluega ma faalapotopotoga a le Malo ia tapu pe faasā ai ona toe aafia fua i upufai o Malo poo polokiki ae faatino o latou tiute e aunoa ma le faaitu’au.
O le silasila a le Komisi Suesue i mea na tutupu i le tuanai o le palota tele o le 2021 sa lē tatau ai ona soona faaaogā lē tatau aseta ma meatotino a le atunuu.
I le vaaleoleo o le Nafanua na pa’ulia ma faaleagaina ona o se faaiuga a le malo Tausi na momoli ai se vaega o leoleo e vaai le tulaga o le saogalemu i le faamoemoe o le faalauiloa a le vaega faaupufai e puipuia aiātatau a tagata sa faia i Savaii ia Aokuso o le tausaga na tea nei, a o tālia faaiuga o faamasinoga e mafua i le palota tele, ua fautuaina e le Komisi Suesue le tatau ona faaauau pea se suesuega.
Ona o le taugata o lea aseta tāua a le Malo na faameaalofa mai e le Malo o Ausetalia i le tau e 30 miliona tala, ua fautuaina e le Komisi le faamautu o ni aiaiga o le tulafono e toe faaola mai ai e i latou na faia le faaiuga i le aseta o le vaa lea o le Nafanua ua faaleagaina.
Mo le silafia sa filifilia e le Malo ni sui o se Komisi Suesue i le faaletonu na aafia ai lea meatotino taugata, ae peitai na toe taofia ina ua faia faaiuga a le faamasinoga a leoleo i le alii kapeteni na faafoeina le vaa.
O le amataga foi o le tausaga fou o le a taunuu ai le vaaleoleo fou ua toe fausia i fesoasoani a Ausetalia mo Samoa e sui ai le Nafanua II ua leaga.
