O le mataupu mulimuli lenei o gasegase a malo o itumalo e 28 lea na tuuina atu tagi o faatosina o le faigapalota lea na tuuina mai ai i le aoauli nei e le faamasinoga le iuga mo le Itumalo o Sagaga No.1 e faaleaogaina uma tagi a itu e lua ae tumau le tofi faipule filifilia a le afioga ia Loau Solamalemalo Keneti Sio.
O lenei mataupu na ave ai le tagi a le sui o le vaega faaupufai a le FAST Papalii Tavita Moala faasaga ia Loau faapea foi le tagi a Loau na ave faasaga ia Papalii peitai tali le faamasinoga e faaleaogaina uma nei tagi ma e leai foi se tasi op nei sui e toalua ua faasalaina.
I fafo ane o le potu faamasino na faalia ai le agaga faafetai o le afioga Papalii i le galuega a le faamasinoga ma ua talia ma le agaga faafetai le faaiuga ua tuuina mai.
“E faafetai faapitoa i le vaega faaupufai a le FAST i le lagolago ao faagasolo ai lenei mataupu ae o loo tumau pea le lagolago a le vaega faaupufai”.
Taua foi e Papalii tumau le avea o Loau ma faipule ae o le a agai o ia e galulue i le lagolagoina o le faigamalo fou ma latou tiute tauave.
O le iuga o le faigapalota mo Sagaga No.1 i le Aso 9 o Aperila na manumalo ai Loau i palota e 965, tulaga lua ai le afioga ia Papalii i palota e 668.
