E le’i taunuu ona tagofia e le faamasinoga o faigāpalota i le Aso Faraile ua mavae le talosaga e toe faaui i tua le tagi tau palota mai Falealili 1, ona e toe lua aso faia lea su’esu’ega ae taunuu atu le talosaga a le vaega faaupufai e puipuia aiā tatau a tagata e fia avea ma se tasi o itu auai o lea matāupu tau faamasinoga tau palota.
Ua poloa’ina ai e le afioga i le Faamasino Sili se tasi o Faipule o lea pati faaupufai le tofa Namulauulu Papalii Leota Sami Leota e oo atu i le faamasinoga e faailoa le māfua’aga o lea talosaga lea o loo tula’i ai le alii loia le afioga Faimalomatumua Mathew Lemisio.
Ua taatia ai le su’esu’eina o le talosaga e toe faaui i tua lea tagi o le palota ae se’i Iloilo muamua lea talosaga e iloa ai le talia ma le lē talia.
O le Aso Tofi o le vaiaso nei e su’esu’eina ai le talosaga a le vaega faaupufai o le H.R.P.P.
Ae i le aga’i atu o le faamasinoga o faigāpalota e su’esu’e lea talosaga ua sa’ili nei e le tofa Tuiloma Tusa Laniselota Lameko na faauluina le tagi o moliaga o faatosina faaālatua faasaga i le sui faipule o Falealili 1, se loia e tula’i e finauina lana tetee i le talosaga a le pati faaupufai sa tauva ai i le palota tele.
Ua māfua lea tulaga ona ua faailoa e le loia o Alex Su’a o loo finauina le tagi tau palota e lē mafai ona ia finauina le tetee a lē ua tagi faasaga i le talosaga a le vaega e puipuia aiā tatau a tagata.
I nisi o tala mai le faamasinoga o faigāpalota o le Aso Faraile na te’a nei na tuuina atu ai finauga ma folasaga faai’u a loia i le tagi tau palota mai Falealili 2 lea ua mae’a ona su’esu’eina molimau.
O le Aso Faraile foi ua mavae na faamautū ai le talosaga e ave i tua le tagi tau palota mai le itumalo palota o Vaimauga 2 lea na faaulu e le sui tauva o le Faatuatua i le Atua Samoa ua Tasi le afioga Tamaleta Taimang Jensen faasaga i le sui faipule na toe filifilia o loo lagolago i le vaega e puipuia aiā tatau a tagata, le tofa Lenata’i Victor Faafoi Tamapua.
