Ua lipotia i le asō le faate’ia o le komiuniti a Korea i Niu SIla nei ona o le ono iai o se sootaga o le faalavelave ua maua ai tino maliliu o nai tamaiti e to’alua i atopau e pei ona lipotia atu, ma se tagata mai lo latou atunuu.
Ua ta’ua i lipoti a le Associated Press o se tagata o le aiga o tamaiti e to’alua ia e foliga o loo i Korea i Saute.
Fai mai na faia se faamatalaga a se sui mai le Ofisa o leoleo a Korea i le Associated Press, o le tagata lea o se tamaitai Korea sa soifua ane i Niu Sila nei, ma pe ā ma le 40 tausaga le matua na taunuu atu i Korea i Saute i le 2018.
Faamatala e le peresetene o le asosi a Korea i Niu Sila, Diane Lee, na faate’ia i latou i le tala ma sa o latou fesoota’i foi i leoleo e faailoa iai popolega, ma o le a fesoasoani i soo se auala i le su’esu’ega o loo faia.
Ta’ua e le loia mo aiātatau Tony Ellis i le lipoti a le Televise NZ, o le aumaia o le tagata lea mai Korea i Saute pe afai e mana’omia, o le a faigofie pe afai e lē o se sitiseni o Korea auā e mafai ona teena e Korea le talosaga pe afai o sa latou sitiseni.
E lē o ta’ua se faamatalaga a leoleo Niu Sila i le mataupu lea ona o loo faaauau pea su’esu’ega.
