Ua umia nei e le vaega faaupufai o le Faatuatua i le Atua Samoa ua Tasi nofoa e 32 o le aofa’iga e 51 o nofoa o le Palemene, ina ua manumālō ona sui tauva e to’alua i palota laiti a Vaisigano 2 ma Safata 1 sa faagasolo i le Aso Faraile ua mavae.
E 31 nofoa sa manumālō ai lea vaega faaupufai i le mae’a o le palota tele ia Aokuso o le tausaga ua mavae ae na soloia le nofoa o Safata 1 i faai’uga o faamasinoga o lea palota ma totoe ai le 30.
O lea la ua toe manumālō le Faaatuatua i le Atua Samoa ua Tasi i le nofoa o lea itumalo, faaopoopo iai ma le nofoa o Vaisigano 2 ma ua maua ai le 32 o nofoa ua umia e lea patī faaupufai.
O le vaega faaupufai e puipuia aiā tatau a tagata o loo avea ma Itu Agai ua tumau pea le numela o nofoa o loo latou umia i le 14, ina ua lē manuia o latou sui tauva e to’alua sa finau i palota laiti ua mae’a atu nei.
O le isi lima o nofoa o le Palemene o loo seei ai faipule e to’atolu o le vaega faaupufai o le Samoa ua Potopoto, peita’i e lē o aloa’ia lea vaega faaupufai i le saofa’iga a le Palemene ona e lē atoa le to’avalu o faipule e aloa’ia ai se patī faaupufai ma ua avea ai o sui faipule tuto’atasi.
O le isi lua o nofoa o isi faipule tuto’atasi o nofoa o Siumu ma le Vaa o Fonoti.
O le faai’uga o le palota laitiiti ua manumālō ai le isi sui tauva tama’ita’i mo le nofoa o Safata 1 le afioga Tunumafono Clare Tai Tin i le aofa’iga o palota na ia maua e 555, tulaga lua ai palota na maua e le isi sui tauva tama’ita’i o le Faatuatua i le Atua Samoa ua Tasi, le afioga Tafafunai Saolotoga Fuimaono Mimio e 553 palota na ia maua.
O isi sui tauva e to’alua o lea vaega faaupufai sa tausino foi i le palota laitiiti a Safata 1 o le afioga Tafafunai Aialii Anapu e 384 palota na ia maua ma Tuigamala Vaisilika Vaaiga Tuigamala na ia maua palota e 118.
O le tofa Luailepou Tikilapilesa Misi sa tauva mo le vaega faaupufai e puipuia aiā tatau a tagata e 266 palota na ia maua.
O le itumalo o Vaisigano 2 ua toe manumālō i le tofi o lea itumalo faapalota le afioga Motuopuaa Seve Henney Henry Papalii na ia maua palota e 759, tulaga lua palota na maua e le sui tauva o le vaega e puipuia aiā tatau a tagata le afioga Valasi Luapitofanua Tafito Selesele e 188 palota na ia maua.
